کاروار3/اکتوبر (ایس او نیوز) ریاستی کابینہ نے شہری ترقیات کے لئے بلدی اداروں کو منصوبہ بندی کے تیسرے مرحلے کا فنڈ جاری کرنے کا فیصلہ کیا ہے۔ اس کے تحت ضلع شمالی کینرا کو جملہ 150کروڑ روپے منظور ہوئے ہیں۔جو ضلع کے 3سٹی میونسپالٹی، 4ٹاون میونسپالٹی اور 5ٹاون پنچایتوں میں تقسیم ہونگے۔

ضلع انچارج وزیر مسٹر دیشپانڈے کی طرف سے دی گئی تفصیل کے مطابق کاروار سٹی میونسپالٹی کو 35کروڑ، ڈانڈیلی 25کروڑ،سرسی کو25کروڑ،بھٹکل ٹی ایم سی کو7کروڑ، کمٹہ ٹی ایم سی کو7کروڑاور سداپور، یلاپور، منڈگوڈ، ہوناور اوربھٹکل کی جالی پٹن پنچایت کو پانچ پانچ کروڑ روپے منظور کیے گئے ہیں۔ مسٹر دیشپانڈے نے مزید یہ بھی بتایا کہ ضلع شمالی کینرا میں سمندری موجوں سے ہونے والے ساحلی کٹاؤ کو روکنے والی دیوار تعمیر کرنے کے لئے 4.09 کروڑ منظور کیے گئے ہیں۔